Istorgia | Procap Grischun

	2011 1000 commembers solidarics Margrit Tischhauser Trechsel (amez) vegn beneventada da Céline Benz, manadra dal post da cussegliaziun Tavau/Partenz, e da Diego Farrér, manader da fatschenta da Procap Grischun, sco 1000avla commembra solidarica da Procap Grischun.
	2009 Procap Grischun dumbra 2500 commembers Aaron Noah Casparis, il 2500 avel commember da Procap Grischun, ensemen cun ses geniturs Manuela e Peter Casparis da Seglias ed il president da l’uniun Ilario Bondolfi (a sanestra).
	2006 75 onns Procap Grischun Procap Grischun, l’anteriura Uniun grischuna d’impedids, festivescha l’onn 2006 il giubileum da 75 onns.(Verlinkung Zeitung 75 Jahre)
	Procap Grischun dumbra 2000 commembers Simona, la 2000avla commembra, ensemen cun sia mamma Martina Flütsch da St. Antönien ed il president da l’uniun Agostino Priuli.
	2004 Bündner Jahrbuch 2004 Il Bündner Jahrbuch 2004 ha preschentà en il rom da ses tema principal „Onn europeic dals umans cun impediments” detagliadamain il mintgadi e l’integraziun d’umans cun impediments.

	2003 Angelo e la muetta Fotoshooting per la „Schweizer Illustrierte” dals 8 da settember 2003: l’autur Vincenzo Todisco, il cusseglier federal Joseph Deiss, il pictur artist Rudolf Mirer ed Agostino Priuli, il president da Procap Grischun (da dretga). Sco contribuziun per l’Onn europeic dals umans cun impediments edescha Procap Grischun il cudesch „Angelo e la muetta”. Il cudesch cumpara gia en sia emprima ediziun en tut las quatter linguas naziunalas.
	L’uniun dumbra 1500 commembers Silvia Müller da Tusaun vegn beneventada da Christian Demarmels, cussegliader da la regiun Grischun Central/Mesauc e da Diego Farrér, manader da fatschenta, sco 1500avla commembra da Procap Grischun.
	Il Pitschen Prinzi Cun bler success realisescha Procap Grischun il matg 2003 sin la Piazza da la clinica Beverin a Cazas il gieu al liber „Il Pitschen Prinzi” sco contribuziun a las festivitads da „200 onns Grischun en la Confederaziun”.
	Gea a l’access liber – gea a l’iniziativa davart las persunas cun impediments A chaschun da la votaziun federala dals 18 da matg 2003 davart l’iniziativa dal pievel „Medems dretgs per impedids” tutga Procap tar ils gronds perdents ensemen cun tut las ulteriuras organisaziuns da persunas cun impediments e surtut cun tut ils umans pertutgads en l’entira Svizra.
	Supplement da gasetta integrà L’onn 2003 po vegnir valità per Procap Grischun sco in dals onns cun il pli grond success en l’istorgia da l’uniun da passa 70 onns. La Südostschweiz Publicitas SA deditgescha a Procap Grischun in supplement da gasetta integrà en la Südostschweiz ed en il Bündner Tagblatt. Il purtret mussa il svilup d’ina pitschna uniun ad in’organisaziun d’agid a sasez moderna per umans cun handicap. Supplement da gasetta 2003 (tudestg)
	2002 L’Uniun grischuna d’impedids daventa „Procap Grischun” Ensemen cun l’uniun tetgala lantscha l’uniun grischuna la nova marca „Procap – per umans cun handicap”.
	2001 Avertura dal post da cussegliaziun Grischun Central/Mesauc Ils 20 d’october 2001 vegn avert a Panaduz il post da cussegliaziun Grischun Central/Mesauc.
	2000 L’uniun dumbra 1000 commembers Ils 14 da settember 2000 po l’uniun beneventar il 1000avel commember. Sco surpraisa po Susi Vinzens da Glion, la 1000avla commembra, far in gir cun il helicopter.
	Ir vias cuminaivlamain – surmuntar ils obstachels La finamira da la campagna da reclama „Ir vias cuminaivlamain – surmuntar ils obstachels” è da promover la solidaritad envers umans cun impediments e da render attent la publicitad a barrieras architectonicas. Per l’emprima giada vegn organisada sut il medem motto in’excursiun en sutgas cun rodas spezialas per far trekking.
	Nova gasetta da l’uniun „Activa” Il fegl d’infurmaziun intern existent vegn sviluppà vinavant a la gasetta d’uniun „Activa”.
	In’atgna pagina-web L’uniun è per l’emprima giada preschenta er en l’internet cun in’atgna pagina-web en tut las trais linguas chantunalas.
	Project da teater: Las posaunas da Jerico Sco novum en l’istorgia da l’uniun vegn represchentà il teater „Las posaunas da Jerico” cun acturas ed acturs impedids e betg impedids. Per la reschia è responsabel Philipp Lenz da Cazas. Las represchentaziuns, che retschaivan bler applaus dal public, han lieu a chaschun da l’avertura da la nova chasa da cultura en la Bienenstrasse a Cuira.
	Nova purschida: in servetsch da visita La paletta da servetschs da l’uniun vegn engrondida: cun persunas voluntaras vegn creà in servetsch da visita.
	1999 Nov post da cussegliaziun Tavau/Partenz Ils 21 d’avust 1999 avra l’uniun a Tavau il post da cussegliaziun per il circul da Tavau ed il Partenz.
	Cun forzas unidas cunter l’aboliziun dal quart da renta AI L’uniun s’engascha fermamain e cun success cunter l’aboliziun dal quart da renta AI. Da sanestra: Diego Farrér, manader da fatschenta da l’Uniun grischuna d’impedids, cusseglier naziunal Andrea Hämmerle, cussegliera naziunala Brigitta Gadient, deputada Beatrice Baselgia e deputà Beda Müller.
	Agostino Priuli vegn elegì en la suprastanza centrala A la radunanza da delegads da l’Associaziun svizra d’invalids a Langenthal vegn il president da l’Uniun grischuna d’impedids Agostino Priuli elegì da nov en la suprastanza centrala. Il vicepresident Markus Mehr daventa responsabel da las relaziuns publicas da handisport, il team da Swiss Ski da las persunas cun impediments.
	1998 Campagna en favur da l’egualitad da persunas cun impediments: „Nus essan impedids! Nus savain co ir enturn cun quai. – E Vus?” Cun ina campagna da placats duai l’egualitad da las persunas cun impediments vegnir accelerada. L’uniun spera surtut sin in vast sustegn da l’iniziativa dal pievel „Medems dretgs per impedids”.
	Avertura dal post da cussegliaziun Surselva Ils 14 da november 1998 vegn avert a Rueun (Glion) il post da cussegliaziun per la Surselva.
	Novs statuts da l’uniun A la radunanza da commembers dals 21 da mars 1998 vegn approvada unanimamain la revisiun totala dals statuts da l’uniun.
	Gronda demonstraziun per l’egualitad a Berna Ils 14 da mars 1998 sa participescha l’uniun ensemen cun autras organisaziuns da la Conferenza grischuna da persunas cun impediments a la gronda demonstraziun en favur da l’egualitad. Quella ha lieu avant la Chasa federala a Berna. La pretensiun: medems dretgs per ils impedids.
	1997 Avertura dal post da cussegliaziun Grischun dal Sid Ils 25 d’october 1997 vegn avert a Samedan il post da cussegliaziun Grischun dal Sid.
	Secretariat central a Cuira A partir dal 1. d’avust 1997 vegn installà in secretariat central a Cuira. Il project da la plattafurma da l’avegnir e la nova strategia da l’uniun vegnan realisads. Il president Agostino Priuli (a sanestra) ed il manader da fatschenta da l’uniun Diego Farrér.
	Nov logo da l’uniun A la radunanza da commembers dals 22 da mars 1997 survegn l’uniun in nov logo.
	Augment da las plazzas Il project da la plattafurma da l’avegnir persvada era l’Uffizi federal d’assicuranzas socialas (UFAS). El approvescha ils 28 da favrer 1997 in augment da las plazzas sin totalmain 170 pertschients da plazza (80% per la gestiun e mintgamai 30% per trais posts da cussegliaziun).
	1996 L’uniun dumbra passa 500 commembers Ils 31 da december 1996 dumbra l’uniun 515 commembers.
	1995 Project: plattafurma da l’avegnir Il project da la plattafurma da l’avegnir vegn inizià. A basa d’ina analisa cumplessiva da l’uniun e da l’ambient vegn elavurada ina nova strategia da l’uniun.
	1993 La fusiun a la nova Uniun grischuna d’impedids è reussida A la radunanza da commembers istorica dals 6 da mars 1993 a Domat fusiunescha l’Uniun grischuna d’invalids cun la secziun grischuna da l’Associaziun svizra d’invalids, fundada l’onn 1987. La nova uniun sa numna Uniun grischuna d’impedids. Per la fusiun avevi dà differentas raschuns. Il fatg ch’i deva en il Grischun duas organisaziuns d’agid a sasez per umans cun impediments vegniva resentì adina pli fitg sco nunefficazi. Ultra da quai avevan las duas uniuns da cumbatter cun l’envegliament e cun dumbers da commembers stagnants u regressivs. Ils dus „presidents da fusiun”: plevon Arno Schocher (a dretga) e Jakob Staub.
	1987 Fundaziun d’ina nova secziun en il Grischun Ils 31 da matg 1987 vegn fundà en l’Hotel Chur a Cuira ina nova secziun da l’Associaziun svizra d’invalids.
	1981 Giubileum da 50 onns L’Uniun grischuna d’invalids festivescha ses giubileum da 50 onns.
	1959 Extrada da l’Associaziun svizra d’invalids e fundaziun da l’Uniun grischuna d’invalids. Differentas difficultads han manà a l’extrada da l’uniun tetgala. Il 1959 fundeschan ils commembers extrads da l’Associaziun svizra d’invalids l’Uniun grischuna d’invalids.
	1931 Fundaziun da l’uniun Dumengia, ils 31 da matg 1931 vegn fundada en l’ustaria „Gasthaus Franziskaner” a Cuira la secziun grischuna da l’Associaziun svizra d’invalids.